قصيدة طريفة عن اجواء الباكالوريا

اللي حجّ حج.. واللي عوق عوق.. وتوة لا عاد ينفع فيها شيء.. لا سومان بلوكي.. ولا سليمان بلوكي كيف تقول مماتي. . لا عاد ينفع فيها لمّات وقعدات وسهريات.. ولا جبدان دوسيات من الانترنات ولا زرد ولا كساكس ولا وعد للأولياء والصالحين.. توة اللي حج حج واللي عوّق عوّق..

واللي كان في النهار يطوف وفي الليل يغزل الصوف.. فاتو التران.. ما عليه كان يقمر كيما يعلموا.. يا قرعة يا نوفي.. وهو وزهرو.. يا معري.. يا مسعدي.. ودزّ تخطف.. واللي عندو مواهب في الفوسكوبي ما عليه كان يفتقها.. مادام العام الكل تعدى دربيات في الستاد.. وبطولة عربية وبطولة إفريقية.. وتصفيات كأس العالم.. وفنان ماشي وفنان جاي..وجوير تباع وجوير تشرى.. وحفلات ومهرجانات ..ومسلسلات مكسيكية وتركية وسورية والبايتة التونسية.

بالله وقتاش وليداتنا باش يلقاو الوقت باش يقراو دروسهم ويحضروا الباك متاعهم وقداش باش تكون نسبة النجاح.. على هذاك طلعلي في مخي اقتراح للمسؤولين عن الباك ينجموا يعاونوا بيه ويسهلو كل ما هو صعيب على وليداتنا مثلا نلغيوا مادة العربية والفلسفة والفرنساوية والرياضيات وما نخليو كان السبور على شرط نبدلوه ونردوه كرة القدم .

أما إذا خلّيتو المواد الرئيسية نردها لهم على النحو التالي:

في السبور: آشنية آخر غناية غناها فيراج الترجي في آخر ماتش في البطولة؟

- في الرياضيات: إذا كان قطر حزام هيفاء وهبي 36 وطول فستانها 10 صم مع العلم وأن طول ساقيها متر ونصف فما هي المساحة الجملية للقماش المستعمل في الفستان بالصم المربع وأثبت ذلك بطريقتين مختلفتين؟
:142:
- في الفلسفة: ما هي الدوافع والأبعاد الانسانية والفلسفية في أغنية شخابيط لخابيط وأستشهد على ذلك بأمثلة من الكتابات الموجودة على الحيط وعلى الجدران الخلفية للمعاهد؟

- في العربية: إشرح قصيدة خاينة وما عاد نصافيك وبين بشكل واضح لا لبس فيه إلتصاقها بالواقع معتمدا على قضايا صدى المحاكم ذات الصلة بالموضوع؟

- في الإعلامية: ما هي نسبة الفتيان والفتيات الساهرين للصباح على الانترنات والداخلين والخارجين على الشات للبحث عن الاصحاب والصويحبات؟يظهرلي كان يتبعوا كلامي ويحطوا هالأسئلة في إمتحان الباك ما يدوبل حد وتطلع نسبة النجاح 100% وهكاكة نعيشو الكلنا الأفراح والليالي الملاح.
:142