رسالة حب

رسالة حب من وحي الأحداث في سوريا


6/10/2011







زوجتي الغالية تحية و بعد, يا عمري بحبك أكثر ما أوباما بيحب فلسطين , و إنتي بتتهميني ظلم , اي و حياة حياة و شرف شريفه ان اذا أردوغان خان سوريا بكون انا خنتك. . يا عمري على قدر خوف السعودية من السلاح النووي الإسرائيلي انا بخاف عليكي, اي و الله بحبك قد ما العرعور بيحب أهل حلب, اي اذا الجزيرة بتكذب انا بكذب , كيف ما بتثقي بمصداقيتي معك. . و هي صوت البنت يلي سمعتي صوتها و انا عبحكي معك على الهاتف و حياتك من التلفزيون و اذا مش مصدقة اتصلي بزهير هو شاهد عيان كان معي, حتى الجزيرة بتعتمد على أقواله, صحيح صوتها بيشبه صوت جارتنا , بس الله خلق من الشبه أربعين. .يا عمري اذا بيل كلنتون خانها لهيلاري كلنتون بكون انا خنتك, صدقيني ما عبكذب عليكي و عندي ثلاث شهود عيان, انا ملتزم بالشرف و الامانة الزوجية مثل التزام الجزيرة بالمهنية الاعلامية. . اما البنت يلي شفتيها معي بالمطعم و حياة عمرك لما هي دخلت ما كان في طاولة فاضي بالمطعم و قبل ما انتي تدخلي بشوي الناس طلعت من المطعم و لو تأخرتي شوي بس كانت انتقلت على طاولة ثانية و عرفتي ان ما كنا بموعد, وحياتك لا بعرفها و لا بتعرفني , و اذا أردوغان لما بنى مخيمات نازحين كان بيعرف ان المجرمين رح يقتلوا 120 شرطي بجسر الشغور بيكون انا بعرفها, و اذا كان في شيء بين قطر و تركيا ضد سوريا بيكون في بيني و بينها شيء ضدك. . أما صديقتك يلي شفتيها بغرفة نومنا كانت عبتستناكي لترجعي , و الدليل انك لما دخلتي انتي, كنت انا بالحمام اي شو بيعرفني انها رح تفوت على غرفة النوم و تقلع تيابها لو عارف انها مشوبة كنت شغلت المكيف, حرام ما تظلميها و تظلميني ما في بيني و بينها شي هي كانت بغرفة النوم و انا كنت بالحمام, مش محرزة تتركي البيت و تروحي, اي وحياتك اذا في شي بيربط قطر بقناة الجزيرة بيكون في شيء بيربطني فيها, بشرفك معقول انا اترك عسل مثلك و الحق صديقتك , اي اذا بدك تدللي ان بدللك و مستعد روح إنتظرك على باب بيت أهلك مثل ما الجزيرة انتظرت تشوف نازح على الحدود الاردينة السورية و مثل ما انتظرت دخول الجيش على جسر الشغور, بس لا تخلي حلمي برجعتك مثل حلم تركيا و قطر بتدخل مجلس الأمن بسوريا. . يا عمري انا زلمي بيخاف الله مثل يلي بيكبروا الساعه 12 بالليل و مثل العرعور, و بحترم حقوق المرآة مثل ما السعودية بتحترمها, و مخلص لزواجنا مثل إخلاص دول الخليج للقضية الفلسطينية, و بدعيلك بالتوفيق مثل ما دعا القرضاوي للي تظاهروا على حدود الجولان, و مستعد أطلبك على بيت الطاعه مثل ما طلبت جامعه الدول العربية الناتو لليبيا بس قلبي ما عبيطاوعني. . . أما هيديك البنت يلي شفتيني معها بالفراش هي أغتصبتني, انا قاومت بس ما قدرت هي أرغمتني على هالشي مثل ما الأمن السوري أرغم الناس تطلع مسيرات مؤيدة للرئيس, بفرنسا و ألمانيا و بريطانية و فينزويلا و بالدنيا كلها. . . اي وحياتك بحبك حب نتنياهو لحزب الله, وحياتك بتمنالك الحرية مثل ما بيتمناها أوباما لفلسطين, وحياتك اذا في اتصالات بين دول الخليج و اسرائيل بيكون في اتصالات بيني و بين شي بنت على الفيس بوك, . يا عمري بعرف انك مضايقة بس بعرف ان هلق لما تعرفي (الحئيئة) رح ترجعي للبيت. حبيبك المخلص الوفي